唯快不破 Porsche 911 NFT 鑄造失誤清空買家資產
2023-01-31從來都話機會不等人，所以網絡犯罪組織都會抓緊每個機遇，好似早前佢哋就趁住 Porsche 推出自家名跑 911 NFT 嘅過程搞到一鑊粥之際，瘋狂創造虛假嘅 Porsche NFT 網站等買家上釣，只要用自己嘅加密貨幣錢包買 NFT，即有機會被罪犯清空所有數碼資產，認真無陰公。
事件發生喺上星期，Porsche 原本喺 23 日發行 911 嘅 NFT，第一手售價以價值 1500 美元嘅以太幣（ETH）出售，但喺鑄造過程就出現問題，而原本嘅計劃係鑄造 7500 個 NFT。不過，鑄造過程卻唔多理想，喺 24 小時內只推出咗 20%，令一眾買家非常不滿，而同時間 NFT 交易平台 OpenSea 上嘅易手 NFT 仲平過一手價值，搞到開售事件變成關公災難，而 Porsche 喺 24 日就宣布將會喺第二朝 6 點暫停鑄造過程，直至解決鑄造 NFT 緩慢嘅問題。雖然 Porsche 已經喺 twitter 帳戶發布資訊，但大概係資訊未流傳得咁快，結果網絡犯罪集團建造嘅虛假 Porshce NFT 網站就有機可乘，唔少買家被引導至網站，連結自己嘅加密貨幣錢包搶購 NFT，點擊授權交易後，就發現原來唔小心授權轉出所有資產，一夜清貧！
雖然可能覺得受害者好蠢，但都唔可以完全 blame the victims，因為罪犯真係將虛假網站做到同真嘅一樣，其中一個網站更註冊為 porsche-nfts .com，同真嘅 nft.porsche .com幾乎一樣。另外，罪犯仲喺網站入面加上官方嘅正牌 discord channel 連結，提升騙案嘅可信性，所以當大家一時心急掛住搶 NFT 時，咪就咁中咗招囉。