川口春奈 出 Po 自抽增自信
2016-10-30童星出身嘅日本女星川口春奈自從去年行咗成人禮後（唔好心邪，堅係話佢20歲成年，去咗神宮行成人禮），好似乜運都返晒嚟，不單只同緋聞男友福士蒼汰打風打唔甩，仲劇接劇、戲接戲，拍親嗰啲卡士仲係收視、票房保證，好似今季佢套《Chef～三ツ星の給食～》（強國繹:三星級午餐），就有「女王」天海祐希照住，收視起碼好過同「毒藥」山田涼介拍金田一多多聲。
班宅男話川口呢兩年人氣大爆發，同佢成年後肯影下性感寫真益街坊有關，不過，班憎人富貴嘅日媒當然唔放過佢，上年孖北川景子拍《探偵の探偵》，就搵佢同女神比……臉細，仲用電腦技術將佢兩個樣疊埋，話川口比北川塊面大50%。早前，川口唔知發咩神經，喺自己個Blog度，Po咗幾張相嚟自抽，話「自己嘅相好差。攝影師係好專業但被影嘅好差」之類嘅留言，隨即引爆咗班粉絲，不停咁留言讚佢可愛，又讚佢演技好等等等等。
今日，就有人踢爆，話川口最近周圍同人講，同女王拍劇好大壓力，搞到自己有啲喪失自信，所以先上網自抽，希望Fans留言讚下佢，等佢比啲自信去做落去咁話喎。不過，川口不如去影多幾輯寫真，有無增添自信就唔知，班宅男就肯肯定對你有信心。
來源：