［遊日情報］2000Yen 餃子放題餃子之王將 2 小時超抵任食任飲

2016-09-02 Off By Genki

最近香港的KFC推出打邊爐，去食炸雞的地方打邊爐？出奇地令人覺得好想食。其實今時今日的快餐連鎖店，都爭住推出新套餐去搶客。好似日本的餃子連鎖店── 餃子之王將，就提供埋餃子放題，俾客人在2小時內任點餃子以及五款食物，最抵是只收2000yen，百零蚊港幣就可以食到飽，窮遊日本又多個好選擇。

日本的消閒生活網站 RocketNews24，最近就去了位於日本東京水道橋JR站附近的餃子之王將，雖然同其他分店一樣都是提供相同食物，但就額外推出2小時任食任飲放題，提供的食物包括煎餃子，仲有炸雞、回鍋肉、日式叉燒、炒麵同炒菜，不用擔心兩個鐘內只可以食餃子。同時間，仲可以任點啤酒、燒酹同汽水，2000yen收費認真抵到爛。不過，這個隱藏放題最少要四人以上先可以幫襯，一兩個人去就無機會用到，最適合幾個朋友遊日時去食。