香港玩具節 2016 九展正式開鑼 五大必睇重點逐個數
2016-07-15今年進入第二届的香港玩具節 2016 ，今日正式展開，場地明顯比第一届大，同時「筍」貨亦都比上年多，吸引力自然更加大。不過，始終九展場地有限，如果不想漫無目的又同人迫，記得留意今年玩具展五大必到點，包你一定滿載而歸。
Tomica 會員可以買到首賣三款車仔，全部 $60 。
即時入會，更可用 $60 到這部 Lamborghini Murcielago 。
第一點：Tomica 大型車展
今年玩具節最大型的參展商，一定是 Tomica 的攤位，面積差不多有三個大型攤位大。而最矚目就是由多種不同的模型所組合的大型模型，當中有大量的火車不停行走，亦有超過十層的火車天橋，絕對是影相最佳地點。至於產品方面，減價並不算太多，價勝在場內產品多，可以慢慢行慢慢揀。
Tomica 攤位
佔兩個大攤位的汽車及火車模型，大人細路見到都一定鐘意。
今次 Tomica 的減價不算多，但勝在選擇夠多。
唔買車仔，買人仔都一樣得。
論減價減得多，這個黑武士運輸車都算是其中之一。
第二點：精品 Gundam 平賣
另外一個大型參展商，就是精品，當中佔兩個大攤位，一個是專賣模型，另一個是專賣大型 figure ，其中模型攤位有大量減價的 Gundam 模型，例如沙薩比 Ver.Ka 版，減價賣 $450 ，Perfect Grade 00 Raiser 則減價 ＄1,250 ，仲有不少一百元以下的 HG 模型賣，部分價錢甚至比日本買仲抵。至於大型 figure 則用捉鬼敢死隊為主題，則有限量版舊化鐵人17、巴塞授權公仔等，亦有一定吸引力。
精品攤位
減價減得都不少，其中包括這個鐵血孤兒HiRM版，兩盒 $1,400 ，夾埋朋友先買。
沙薩比 Ver.Ka 版，減價賣 $450，同日本買差不多。
Perfect Grade 突擊自由高達，同樣賣 $1,250 。
限量版舊化鐵人 17 ，在會場首賣。
巴塞授權公仔，造工都幾仔細。
第三點：Eliten同初音約會
至於另一間 Eliten ，在今次會場有不少首賣產品推出，好似玩時大熱的 MAGURO-Senpai（先輩）可在會場預訂，定價 $390 ，同時亦會全球首賣 BE＠RBRICK 1000% GRENDIZER ，定價 $2,990 ，每日限賣 30 個，每人只能買一件。另外，亦有擺放多個不同的模型，當然包括大家最受的初音小姐，初音迷必到。
Eliten 攤位
左方的是 BE＠RBRICK 1000% GRENDIZER ，全球首賣，定價 $2,990。
當然亦有不少性感模型……
最鍾意的艦娘都在展品之列。
第四點：東京玩具睇手塚
今年正值手塚治虫出道 70 週年，而東京玩具則展出大量的手塚治虫筆下的漫畫角色玩具，除了有大家所認識的小飛俠、仲有三眼小子，不過最特別是在攤後後方，特別花費 30 萬設計一個用 LED 屏幕製作的 3D 立體影相區，有四張不同的圖案會自動更換，全部都由日本方面監修，手塚迷必去影相。
東京玩具攤位
原版手塚治虫入面，小飛俠對手 Pluto 巨型版。
鍾意手塚，對這個公仔一定不會陌生。
更有不同顏色的 3D 打印版，但現時自選色不會出售，動漫節先賣。
這個特製的 3D LED 影相位，必定是排隊熱點之一。
第五點：懷舊區及特價區
除了主場館之外，在另一個場館亦有減價區，當中設有 100 元三件任揀，有小朋友最愛的爆旋陀螺、玩具啤酒器、日本親子食物製作玩具等，要揀三件絕無難度。至於懷舊區方面，有大量舊玩具，而且不單止可以睇，更可以買，最重要是價錢相當合理，要找回童年回憶必到。
懷舊玩具區
新興玩大膠，以前更加流行。
當中有不少珍藏，更有不少童年回憶。
當中亦會出現較為新的模型。
《皇家雙妹嘜》當年都有出過模型，一套四件。
100元3件專區